Илус Ярмиев эре мал чалып, махсус хәрби операциядә һаләк булган райондашларыбызның гаиләләренә ярдәм күрсәтте

Бүген, Корбан гаетенең өченче көнендә, "Башак" хуҗалыгы рәисе Илус Ярмиев эре мал чалып, махсус хәрби операциядә һаләк булган райондашларыбызның гаиләләренә ярдәм күрсәтте. Барлыгы 128 гаиләгә ярдәм күрсәтелде. 

Элек-электән үк татар халкында хәйрия, сәдака тарату булган. Нинди генә авыр вакытлар булуга карамастан, хәйриячелек тукталмаган. Бүгенге көндә дә арабызда авыр тормыш хәлендә калган кешеләргә ярдәм итәргә теләүчеләр, Илус Ярмиев кебек олы йөрәкле кешеләр күп.

Алда әзерләнәчәк чираттагы гуманитар ярдәмгә дә бер эре мал бирәчәген искәртте ул. Апаларыбыз ярдәме белән итне киптереп, ит тушенкасы ясап егетләргә җибәреләчәк. 

Мохтаҗларга ярдәм итү – Аллаһы Тәгаләнең әмере икәнен дә онытмыйк. Һәрберебез үзеннән соң якты эз калдырырга тырышсын, миһербанлылыкка урын калдырсын иде. Илус Илдус улына ихластан рәхмәт. Әлеге гамәл башка эшмәкәрләргә, җитәкчеләргә үрнәк булсын иде.