Актанышның Җиңү паркында махсус хәрби операциядә катнашучыларга һәйкәл куелачак

Фото: Актаныш-Хәбәр

Бу мәңгелек стела – туган ил өчен көрәштә гомерләрен биргән геройларны искә алу урыны. Кайгы да, горурлык та биредә бергә. Кайгы – чөнки без батырларыбыз белән исән чакта сөйләшә, кочаклап, рәхмәт әйтә алмадык. Горурлык – чөнки аларның исемнәре мәңгелеккә тарих битләренә алтын хәрефләр белән язылып куелды.

Ветераннар, махсус хәрби операциядән вакытлыча ялга кайткан һәм комиссияләнгән ир-егетләр стелага чәчәкләр куйдылар. Бу – шушы көнне көткән һәм дошманны җиңгән буынга да, бүген үз гомерләрен куркыныч астына куйган геройларга да баш ию.

Район башлыгы Ленар Зарипов һәм депутат Альберт Хабибуллин ветераннар белән аралашып, тыныч тормыш, исәнлек-саулык һәм ныклык теләделәр. Киләчәктә бу стела янында монумент калкып чыгачак, һәм анда һәр актанышлы үзенең яклаучысын, үзенең батырын хөрмәт итә алачак.

Ләкин бүген инде, стела каршы беренче чәчәкләргә күмелде. Сүзләрдә – рәхмәт, йөзләрдә – хәтер, күзләрдә – яшь. Кайтканнарга шатлык, мәңгелеккә күчкәннәрне уйласак,  кайгы. Җиңү көне безнең өчен мәңге шундый булып калачак – ул безне берләштерә һәм батырлыкка өйрәтә.