Матур булсын: Үзәкләштерелгән хисапханә хезмәткәрләре чисталык ике айлыгына кушылды

             Халкыбызның яраткан бәйрәменә чит төбәкләрдән дә якташлар, киленнәр, кияүләр, кода-кодагыйлар кайта. Кунак килсә ит пешә, ит пешмәсә, бит пешә, я булмаса, кунак аз утырыр, күп сынар дигәндәй,  бәйрәмгә килүчеләрне Актанышыбыз матурланып, чистарып каршыласа үзебез өчен күңелле бит.

Чүп-чарга баткан, кыршылган буяулы коймалар, себерелмәгән, чистартылмаган урамнар өчен оялып кызарырлык булмасын.  

          Оешма-предприятие уңганнары чисталык икеайлыгы кысаларында өмәләргә чыгып Актанышыбызны Сабан туена да әзерлиләр.

Әле генә Актаныш башкарма комитеты җитәкчесе Илнур Хуҗиннан тагы бер хәбәр килде. Үзәкләштерелгән хисапханә хезмәткәрләре дә чисталык ике айлыгына кушылган.

Хисапчы хатын-кызларыбыз юл буйларындагы бордюрларны, күрсәтмә торбаларны буярга чыкканнар. Уңган, булган райондашларыбызга "Афәрин!" дип, рәхмәт сүзләрен җиткерәбез. Башка оешмаларны да өмәләргә чакырып калабыз.