Музейда кунакта

Безне озынайтылган көн төркеме тәрбиячесе Лилия Илдар кызы һәм рәсем түгәрәге җитәкчесе Клара Әмирҗан кызы алып бардылар. Музей хезмәткәрләре безне якты йөз белән каршы алды.

Кичә Минтимер Шәрип улына багышлап ясалган аерым бер залда оештырылды. Иҗат үзәге хезмәткәре Илвира Мөхәмәтҗанова залдагы экспонатларны, фотоларны күрсәтә-күрсәтә Президентыбызның балачагы белән таныштырудан ук башлап җибәрде сүзен.

Минтимер Шәймиев Әнәк авылында гаиләдә тугызынчы бала булып дөньяга килгән. Бик күп вакытын табигатьтә үткәргән. Бигрәк тә яз айларын яраткан. Яланда сыер көтү, ат чаптыру, "Карга боткасы" бәйрәмен уздыру, урманга җиләккә йөрүләр һәм безнең өчен таныш булмаган "сөяк" һәм "борчак урлау" уеннары турында сөйләде. Минтимер Шәрип улы кече яшьтән үк тырыш һәм максатчан булган. Ул тырышлык куеп баянда уйнарга өйрәнгән. Аның бу сәләте әби-бабаларыннан ук килгән. Әбисе дә, бабасы да скрипкада бик оста уйнаганнар.

Президентыбызның авыл тормышында кайнап үсүе аның сайлаячак һөнәренә йогынты ясамый калмый. Ул мәктәпне тәмамлаганнан соң, Казан авыл хуҗалыгы институтына укырга керә һәм үзенең гомерен халык тормышын яхшыртуга багышлый.

Бәйрәм җыр, бию, нәфис сүзләр белән үрелеп барды. Бигрәк тә Ләйсән башкаруында "Зәңгәр күл" җыры, Искәндәрнең "Татарстан"(авторы Рафис Корбан) шигыре күңелләргә хуш килде.