Суга кытлык башланды

Безне- карт-карчыкларны, сугыш чоры балаларын тизрәк үлеп бетсеннәр дип тырышалар кебек тоела башлады. Су проблемасы борчый.
2010 елга чаклы Яңа Әлем авылында эчә торган суга кытлык булмады. Авылның бер-ике слесаре су ала торган колонкаларны һәрвакыт төзек тотты: су кыш та, җәй дә килеп торды. 2010 елда Яңа Әлем авылы җирлеге су системасын Актаныш торак-коммуналь хуҗалыгына тапшырды, шуннан соң суга кытлык китте.
Быел 2 март көнне өйгә кергән су туңды, безнең яндагы колонка кыш буе эшләмәде, чөнки бозын ватып-карап торучы юк, ә халыкка, су алган өчен дип, ай саен түләү кәгазе килеп тора. Шуңа безнең яндагы колонкадан су алып булмас микән дип, 5 мартта Актаныш торак-коммуналь хуҗалыгы җитәкчесе. Р.Кустовага барып гозеремне җиткердем. ЖКХ слесарьләре килеп, безнең колонканың су ала торган шлангысын кисеп атып, су чыга торган торбага агач чөй кагып киттеләр. 2 майга чаклы сусыз тордык. 2 майда тагы слесарьлар килеп, су килми торган торбага шланг ялгап киттеләр, ә су килә торбада агач чөй калды. ЖКХ җитәкчелеге махсус эшләми микән, дип уйлыйм. Кешеләр шикаять белән йөрмәсеннәр дип.
Хәзер без кайда нинди су бар-шуны эчәбез. Йогышлы эчәк авырулары да эләгергә ихтимал. Эчем авыртып, Актаныш хастаханәсендә булдым инде. Табиблар бер кочак дарулар язып җибәрделәр. Әгәр бу хатка бернинди дә җавап алмасам, тагын нишләргә инде?