Мерәс авылында яшәүче 40 ел шофер булып эшләгән ветеранга 90 яшь

90 яшәр райондашларыбыз, шөкер, үз аякларында, үз акылларында юбилей бәйрәмнәрен күтәренке кәеф белән каршы ала. Шуларның берсе Мөхәммәтнур Мөхәммәтдинов Мерәс авылында яши. Мөхәммәтнур Мөхәммәтдин улына бүген, 4 августта 90 яшь тулды.

Юбилярны бәйрәме белән котларга район башкарма комитеты җитәкчесенең социаль мәсьәләләр буенча урынбасары Дилбәр Әнвәрова килде. Дилбәр Миркасыйм кызы Мөхәммәтнур Мөхәммәтдиновка җитәкчеләр Россия президенты В. В. Путинның тәбрикнамәсен һәм районыбыз башлыгының күчтәнәчләрен тапшырды.«Нур» хуҗалыгы җитәкчесе Дәниф Харисов һәм Уразай авыл җирлеге башлыгы  Гүзәлия Шәймәрданова да күренекле авылдашларын бүләкләр һәм котлаулары белән сөендерделәр.

Мөхәммәтнур Мөхәммәтдин улы озак еллар, төгәлрәк әйткәндә, 40 ел буена элекке «Таулар» хуҗалыгында шофер булып эшли. Аның фидакарь хезмәте турында хәзер дә мактап телгә ала замандашлары.  

 Хезмәт сөюче, тынгысыз райондашыбызны 90 яшьлек юбилее белән без дә ихластан котлыйбыз, үзенә һәм якыннарына сәламәтлек, озын гомер, җан тынычлыгы телибез!