Яңа Кадермәттә алтын туй: Низамовлар гаиләсе бергә яшәүләренә 50 ел тулуны бәйрәм итте

Ләйсән ГАЗИЗОВА, 25 март 2024 - 08:31

635

Яна Кадермәт авылыннан Низамов Мөдәрис Мөхәммәтдин улы белән Низамова Алмазия Галимҗан кызының бергә гомер итүләренә 50 ел. Районыбызда алтын туйларын билгеләүче гаиләләрне хөрмәтләү күптәннән килә. Бу юлы да традицияне дәвам итеп районыбызның тантаналар залында үрнәк гаиләләрне хөрмәтләделәр. Алар арасында Яңа Кадермәт авылында яшәүче Низамовлар гаиләсе дә бар иде.

❮ ❯

Яңа Кадермәттә алтын туй: Низамовлар гаиләсе бергә яшәүләренә 50 ел тулуны бәйрәм итте

Район ЗАГС бүлеге мөдире Гөлфинә Мөхәммәдиева Мөдәрис һәм Алмазия Низамовлар гаиләсенең тарихы белән таныштырды.

Хезмәт белән күтәрелгән Низамовларны тәбрик итәргә тантанага килгән якыннары, күршеләре, туганнары да әлеге матур гаилә турында иң якты хатирәләре белән уртаклашты.

Низамов Мөдәрис Мөхәмәтдин улы 1949 елның 15 февралендә Яңа Кадермәт авылында, Низамова Алмазия Галимҗан кызы Аккүз авылында 1954 елның 5 декабрендә туа. 1974 елның 24 январендә яшь гашыйклар гаилә корып җибәрәләр. 3 балалары бар- 1 кыз, 2 малай үстерәләр. Уллары Илнар, Илгиз һәм кызлары Илүзә хәзерге вакытта Чаллыда яшиләр.

Мөдәрис абый Чаллыда автобус шоферы, 1999 елда авылга кайткан көннән бирле Чишмә колхозында шофер булып эшләгән. Алмазия апа Чаллыда 25 ел кранда эшли, ә авылга кайткач сатучы булып хезмәт куя.

Бүгенге көндә Низамовлар гаиләсе 6 онык һәм 1 оныкчыкларының кадерле дәү әнисе, дәү әтисе булып гомер кичерәләр. Яңа Кадермәт авылының иң тату, иң матур, иң күркәм, иң ярдәмчел гаиләләренең берсе алар, авыл халкы бу матур гаиләне бик хөрмәт итә.