Бердәмлек билгесе: май ялларында зиратлар тәртипкә китерелде

1, 2, 3 май ялларында авыл халкы, бердәм булып, мәңгелек йортыбыз булган зиратларны тәртипкә китерүгә чыкты. Кыш буе җыелган корыган агачлар, сынган ботаклар җыештырылды, үләннәр тырмаланды, каберлекләр чистартылды. Бу эшкә өлкәннәр дә, яшьләр дә, хәтта бәйрәмгә кайтып төшкән кунаклар да теләп кушылды. Һәркем күңел кушуы буенча, ата-бабалар рухына хөрмәт белдереп хезмәт итте.

Такталачык авыл җирлеге дә бу игелекле эштән читтә калмады. Авыл җирлеге башлыгы Илнур Хуҗин бүген үк авылның ике зиратында да өмәләр гөрләп баруы турында хәбәр итеп, фотолар белән уртаклашты.

— Барлык халык, кайткан кунаклар зират өмәләренә чыкты. Өмәләр алдагы бәйрәм көннәрендә дә дәвам итәчәк, — дип билгеләп үтте ул.

Чыннан да, мондый өмәләр — гади җыештыру гына түгел. Алар — буыннарны берләштерүче, хәтерне яңартучы, күңелләрне якынайтучы күркәм традиция. Зиратларны тәртиптә тоту — ул ата-бабаларыбызга хөрмәт күрсәтү, үзебезнең тамырларыбызны онытмау билгесе.

Авыл өстендә яңгыраган көр тавышлар, кулга-кул тотынып эшләүче кешеләр — болар барысы да халкыбызның бердәмлеген, тырышлыгын һәм рухи байлыгын чагылдыра. Шундый мизгелләрдә авыл тагын да ямьләнә, күңелләргә тынычлык иңә.