Яңа Кормашта яшәүче Илһам Шакиров хәрби операциядәге авылдашына ВАЗ-2106 автомобилен юллаган

                      Хәрби хәрәкәткә мобилизацияләнгән якташларыбызга ярдәмне туплауга олысы-кечесе кушылды. Гуманитар ярдәм белән беррәттән, берничә автомобиль дә җибәрелде.

                    Изге Рамазан аенда Яңа Кормаш авылында яшәүче Илһам Шакиров авылдашы хәрби операциягә киткән Ренат Хәбировка "ВАЗ 2106" автомобиль юллады.

Тимер ат тиз арада  иясенә барып ирешкән. Бу хакта безгә Яңа Кормаш клубы җитәкчесе Эльмира Шәймөхәммәтова хәбәр итте. 

                Ренат Яңа Кормаш авылында туып-үсә, соңгы елларда Чаллы шәһәрендә яши. Хәрби операциягә дә Чаллы шәһәреннән мобилизацияләнә. Хәзерге вакытта ул Мариуполь каласында Ватан алдындагы бурычын үти. 

-Авылдашыбыз Илһам Шакиров бик тыйнак кеше. "Беркая да язмагыз, кирәкми", дисә дә изге Рамазан аенда кылган саваплы гамәле без- авылдашлар өчен олы горурлык. Аңа барыбыз исеменнән зур рәхмәт әйтәбез. Изгелекләрең меңе белән үзеңә әйләнеп кайтсын. Ә Ренатның тиз арада исән-имин  әйләнеп кайтуын теләп калабыз,- ди Эльмира Шәймөхәммәтова. 

          Әлеге изге теләкләргә без дә кушылабыз. Илләребез тыныч, күкләребез аяз булсын, райондашларыбыздан гел шундый яхшы хәбәрләр генә килеп торсын!