Булачак әти-әниләр! Туасы сабыйларыгызга автокресло алдыгызмы әле?

Нәкъ менә шушы максаттан Юл хәрәкәте куркынычсызлыгы дәүләт бюджет учреждениесенең Актаныш районы буенча җитәкчесе Ләйсән Мөхәммәтова һәм Социаль яклау бүлегенең гаиләгә һәм балаларга социаль ярдәм күрсәтү бүлеге психологы Эльвира Хәмидуллина Актаныш район үзәк хастаханәсенең бала тудыру бүлегенең консультация бүлекчәсендә булачак һәм яшь әниләр белән очрашу үткәрделәр. Очрашу барышында белгечләр файдалы киңәшләр бирде, җанлы әңгәмә корды, белешмәлекләр таратты.

Куанычлысы — очрашуда катнашкан әниләрнең күбесе инде балаларының иминлеген кайгыртып, автокресло сатып алган. Аларга чын күңелдән «афәрин!» диябез

2025 елның 29 декабреннән Россия Федерациясенең Административ хокук бозулар кодексының 12.23 нче маддәсе, 3 нче өлешенә кертелгән үзгәрешләр үз көченә керде. № 525-ФЗ Федераль законы нигезендә балаларны йөртү кагыйдәләрен бозган өчен җаваплылык сизелерлек катгыйланды.

Әлеге үзгәрешләр шофёрларга да, пассажир ташучыларга да кагыла.

• Шофёрлар (шул исәптән «Профессиональ керемгә салым» махсус режимында эшләүче, такси хезмәте күрсәтүче үзмәшгульләр дә) балаларны йөртү кагыйдәләрен бозган очракта хәзер вазифаи затлар кебек җавап тота.

• Юридик зат булмыйча пассажир ташу белән шөгыльләнүчеләр (шәхси эшмәкәрләр һ.б.) җаваплылык ягыннан юридик затлар белән тигезләштерелә.

Штрафлар артты

Балаларны йөртү таләпләрен үтәмәгән өчен штрафлар түбәндәгечә билгеләнде:

• Шофёрлар өчен — 5 000 сум
  (элек 3 000 сум иде)

• Вазифаи затлар өчен — 50 000 сум
  (элек 25 000 сум)

• Юридик затлар өчен — 200 000 сум
  (элек 100 000 сум)

Шулай итеп, балаларны йөртү өлкәсендә административ җаваплылык шактый көчәйтелде. Бу чараларның төп максаты — юл хәрәкәте вакытында сабыйларның иминлеген тәэмин итү, ата-аналарны җаваплылыкка чакыру.

Бала гомере— иң зур кыйммәт. Аның хәвефсезлеге турында кайгырту бүгеннән үк башлансын.