"Әтәчкәй"нең "Кыю кызлар"ы район оешмаларының театр фестивален ачты

                 Балаларның яраткан тәрбиячеләре, кече тәрбиячеләре, тәмле ашлар белән сыйлаучы апалары, тәртип-пөхтәлек урнаштыручы ханым-кызлар 50 минут дәвамында башка һөнәр ияләре булып торды.

Нигездә, тамашачылары да артистларны көн саен күреп-күрешеп торган хезмәттәшләре, ата-аналар, балалар иде.

Көндәлек тормыштагы якыннарының уеннарын алар аеруча кызыксынып карады, урыннан көч биреп утырды, пәрдә ябылган саен алкышлап сәхнә артына озатты. 

                Бакча коллективы уены чыннан да чын артисларныкыннан ким түгел. “Кыю кызлар” дагы иң кыю кыз Бибкәйнур ролен Ирина Бәдертдинова аеруча оста башкарды.

Ирина һөнәре буенча да сәхнәгә якын, ул балалар бакчасында музыка җитәкчесе  Соңгы елларда балаларны гына түгел, хезмәттәшләрен дә сәхнә серләренә төшендерә. Таҗи Гыйззәтнең “Кыю кызлар” комедиясен куючы режиссеры да ул.

Бары тик нәфис затлардан гына торган коллектив өчен менә дигән әсәргә тукталганнар- рольләрнең барысы да хатын-кыз образлары.  Бакча мөдире Миләүшә Әгъләмова әйтүенә караганда, комедияне сәхнәгә куюга бар коллектив тартылган.

 13 хезмәткәр рольләрне башкарса, калганнар костюмнар әзерләгән, сәхнә декорациясен ясаган. 
              Артист кызларның берсенең генә уенын аерым мактау килешмәс, барысына да хуплау сүзләрен генә әйтәсебез килә, афәрин!

1917 елгы революция алдыннан язылган әсәрдә хатын-кыз иреге алгы планга куела, мулла-мунтагай гаиләсендә барлыкта, муллыкта үскән кызларның ни әдәпкә, ни тәрбиягә ия булмыйча үсүләре көлке дә, кызганыч та. Авылдагы ятимә кызларны шәһәргә алып килеп сату, мескеннәрне төрлечә куллану, файдалану проблемалары бүгенге көнгә дә аваздаш. Классик әдипнең юмор-сатира аша татар хатын-кызының аяныч язмышын оста күрсәтеп бирә алуы бүгенге язучыларга үрнәк. Ә артистлар авторның идеясен тулысынча ачтылар.

Бибкәйнурны уйнаган Ирина Бәдертдиновага, Миләүшә - Эльвира Шәрипова, Гайшә - Ләйсән Шәйхәйдарова, Хаҗия - Айгөл Мәрданова, Сафура - Альбина Сарварова, Җомабикә - Розалия Нуриева, Зөлкагыйдә (саңгырау) - Айгөл Галиева, Зөлсәгыйдә (сакау) - Эльмира Габдрахманова, Зөлхәмидә (тынкыш танау) - Рәйлә Садыйкова, шулай ук күмәк күренешләрдәге кызлар - Алинә Хөсәенова, Эльвира Ганиева, Лениза Насырова, Регина Салиховага тагын бер кат “Афәрин!”, диябез. Музыкаль бизәлеш өчен җаваплы Ләйлә Закирова һәм суфлер Эльвира Мансурованың да бу чыгышны әзерләүдә зур хезмәтләре кергән.

           Бакча коллективы 2018 елда район оешма-предприятиеләренең театр айлыгында Мәҗит Шамхаловның "Кайнана" комедиясен куеп Мактау кәгазенә, ә  2020 елда районкүләм "Гасыр авазы" фестиваль-конкурсында "Онытырга мөмкин түгел" композициясе белән 3 урынга лаек булган иде. Бу юлы да сынатмадылар, нәтиҗәләр дә уңай булыр.