Актаныш районы мәгариф учреждениеләрендә террорчылыкка каршы өйрәнүләр узды

Актаныш районы Мәгариф идарәсе тарафыннан өйрәнүләрне әзерләү һәм үткәрү буенча тиешле боерык чыгарылган, оператив штаб составы расланган һәм чаралар планы төзелгән, -дип хәбәр итте мәгариф идарәсе белгече Айрат Кәрамов.

мимҗмҗ

Өйрәнүләр барышында мәгариф учреждениеләрендә гадәттән тыш хәл килеп чыккан очракта хезмәткәрләрнең, сак хезмәтенең һәм ашыгыч хезмәтләрнең бердәм һәм дөрес эш итү алгоритмнары тикшерелде.

Өч төп шартлы ситуация каралды.

Беренче сценарий — бинаны басып алу һәм тотыкка алу. Шартлы рәвештә чит кешеләрнең- террористларның мәгариф учреждениесенә үтеп керүе, кешеләрне тотык итеп алуы күздә тотылды. Мондый очракта хезмәткәрләрнең һәм сакчыларның гамәлләре өйрәнелде. Алар тревога төймәсенә басып, ашыгыч хезмәтләргә хәбәр итәргә тиеш иде. Алга таба полиция хезмәткәрләре килеп, вазгыятьне контрольгә ала һәм заложникларны азат итү буенча тиешле чаралар күрә.

Икенче сценарий — бинага ут төртү. Өйрәнүләр вакытында шартлы рәвештә мәгариф учреждениесенә үтеп кергән кешенең янгын чыгарырга омтылуы күрсәтелде. Бу очракта хезмәткәрләрнең янгын сүндерү хезмәтенә һәм башка оператив хезмәтләргә тиз арада хәбәр итүе, кул астындагы янгын сүндерү чараларыннан файдаланып, утны сүндерергә омтылуы өйрәнелде. Шул ук вакытта кешеләрне имин урынга, запас чыгу юллары аша эвакуацияләү алгоритмы да тикшерелде.

Өченче сценарий — пилотсыз очкыч һөҗүме. Соңгы вакыттагы вакыйгаларны исәпкә алып, шартлы рәвештә пилотсыз очкычның мәгариф учреждениесе бинасына килеп бәрелүе яки аның янына шартлаткыч җайланма ташлануы каралды. Мондый очракта төп бурыч — кешеләрнең гомерен һәм сәламәтлеген саклау. Шуңа күрә хезмәткәрләрнең һәм укучыларның запас чыгу юллары аша тиз һәм оешкан төстә эвакуацияләнү тәртибе эшләнде.

Өйрәнүләрнең төп максаты — гадәттән тыш һәм террорчылык характерындагы вазгыятьләр вакытында мәгариф учреждениеләре хезмәткәрләренең әзерлеген тикшерү, аларның дөрес һәм оператив эш итү күнекмәләрен ныгыту, шулай ук ашыгыч хезмәтләр белән үзара хезмәттәшлекне камилләштерү.

Районда оештырылган өйрәнүләрнең аерым өлешендә янгын сүндерүчеләр, хокук саклау органнары хезмәткәрләре һәм ашыгыч медицина ярдәме вәкилләре дә катнашты. Калган мәгариф учреждениеләрендә өйрәнүләр расланган план нигезендә мөстәкыйль рәвештә үткәрелде.

Актаныш районы мәгариф идарәсе җитәкчесе Раниза Шакирова чара барышын күзәтеп, коллективның әзерлегенә һәм төрле хезмәтләр белән үзара эшчәнлеккә игътибар итте.

Планнан тыш өйрәнүләр дә кирәк

Мәгариф идарәсе җитәкчесе билгеләп үткәнчә, мондый чаралар бер тапкыр гына үткәрелеп калырга тиеш түгел.

— Без бүген өч сценарий буенча эшне күзәттек, нәрсәләргә игътибар итәргә кирәклегенә басым ясадык. Бу өйрәнүләр безгә тагын бер нәтиҗә ясарга мөмкинлек бирде: ел дәвамында да планнан тыш, көтмәгәндә өйрәнүләр үткәрергә кирәк. Чынбарлыкта килеп чыккан ситуациядә коллективның ничек реакция ясавы, дөрес һәм тиз карар кабул итә белүе бик мөһим, — диде Раниза Шакирова. Аның сүзләренчә, август киңәшмәсе барышында бу мәсьәләгә аерым игътибар юнәлтеләчәк.

«Бердәмлекне югалтмыйча эшләргә язсын»

Раниза Шакирова мәгариф оешмаларының ел дәвамында төрле структуралар белән берлектә эшләвен билгеләп үтте.

— Без ел дәвамында барлык структуралар белән бергә, бердәм эшлибез. Алга таба да шушы бердәмлекне югалтмыйча, эшләргә язсын. Яңа уку елында барыгызга да уңышлар телим. Иң мөһиме — бүгенгедәй аяз күк йөзе булсын, — диде ул. Мәгариф идарәсе җитәкчесе тынычлыкның кадерен бүген аеруча тирәнрәк аңлау кирәклеген ассызыклады.

«Тылсым» балалар бакчасында да өйрәнүләр узды

Өйрәнүләрнең икенче этабы Актаныштагы Химиклар урамы, 2нче йорт адресы буенча урнашкан «Тылсым» балалар бакчасында үткәрелде.

Балалар бакчаларының үзенчәлеген исәпкә алып, мондый учреждениеләрдә иминлек мәсьәләләренә аеруча зур игътибар бирергә кирәк.

— Бу — аерым игътибар һәм зур җаваплылык таләп итә торган участок. Шуңа күрә тәрбиячеләрдән үтә дә игътибарлы булу, шулай ук ел дәвамында ата-аналар белән әлеге юнәлештә эш алып бару таләп ителә, — дип ассызыклады Раниза Шакирова.

Бу күнегүләрнең реаль тормышта кирәк булмавын телибез

Раниза Шакирова бүгенге вазгыятьтә һәркемнең көтелмәгән хәлләргә әзер булырга тиешлеген билгеләп үтте.

— Дөнья бүген тыныч түгел. Көн саен диярлек төрле сигналлар килеп тора. Шуңа күрә нинди генә очрак булса да, һәрберебез әзер булырга тиеш. Мондый өйрәнүләр өйрәнү генә булып калсын. Барыгызга да бары тик тыныч тормыш, тыныч һәм аяз күк йөзе телим. Балаларыбыз исән-сау булсын, аларның сәламәт, шат тормышын күреп кенә яшәргә язсын, — диде мәгариф идарәсе җитәкчесе.

Актаныштагы «Тылсым» балалар бакчасында террорчылыкка каршы юнәлтелгән команда-штаб өйрәнүләре узды. Бүгенге көндә биредә 100 бала тәрбияләнә.

Өйрәнүләр заман таләпләренә туры китереп, балалар һәм хезмәткәрләрнең гадәттән тыш хәлләр вакытында үз-үзләрен тоту күнекмәләрен ныгыту максатыннан үткәрелде.

— Бүгенге вәзгыятьне истә тотып, балалар бакчасында ел дәвамында мондый өйрәнүләрне үткәреп киләбез. Һәр хезмәткәр гадәттән тыш хәл килеп чыккан очракта нәрсә эшләргә кирәклеген белергә тиеш. Теоретик өлешкә дә, практик күнекмәләргә дә зур игътибар бирәбез, — ди балалар бакчасы мөдире Миләүшә Вахитова.

Балалар бакчасына бу көнне төрле төркемнәрдән барлыгы 46 бала килгән иде. Шуларның 10ы — ясле төркеменнән, 12се — уртанчылар төркеменнән, 16сы — өлкәннәр төркеменнән, 8е — мәктәпкә әзерлек төркеменнән. Аларның барысы да өйрәнүләрдә катнашты.

Киңәйтелгән форматтагы өйрәнүләрдә хезмәткәрләрнең ике төрле шартлы сценарий буенча гамәлләрен сыналды: балаларны тотыкка алу очрагы һәм янгын чыккан вакытта балаларны эвакуацияләү.

Тәрбиячеләр эвакуация вакытында һәр төркем өчен билгеләнгән чыгу юллары буенча хәрәкәт итү тәртибен берничә тапкыр кабатлаганнар. Балалар кечкенә булу сәбәпле, аларны тиз һәм оешкан төстә имин урынга чыгару аеруча игътибар һәм саклык таләп итә.

— Балалар белән эвакуация үткәрү җиңел түгел. Алар кечкенә, шуңа күрә имин урынга чыгу өчен вакыт күбрәк кирәк. Һәр төркемнең үз эвакуация юлы бар. Без балаларны баскычлардан тәртипле һәм куркынычсыз төстә төшәргә өйрәтәбез. Мондый күнекмәләрне даими кабатлап тору мөһим, — ди Миләүшә Әфка кызы.

Команда-штаб өйрәнүләре хезмәткәрләргә төрле куркыныч хәлләрдә югалып калмаска, тиз һәм бердәм эш итәргә өйрәнергә мөмкинлек бирә.

— Мондый хәлләр бары тик өйрәнүләрдә генә калсын иде. Илләребез тыныч булсын, барлык учреждениеләргә дә исән-имин эшләргә язсын. Хезмәткәрләр дә, балалар да мондый хәвеф-хәтәрләрне күрмәсен иде, — дип теләкләрен җиткерде балалар бакчасы мөдире.

Өйрәнүләрнең төп максаты — гадәттән тыш хәлләр вакытында дөрес һәм оешкан төстә эш итү күнекмәләрен ныгыту, балаларның һәм хезмәткәрләрнең иминлеген тәэмин итү.