Пучы картлар һәм инвалидлар йортында өлкәннәрне хөрмәтләделәр

Өлкәннәр өчен җыр-моңга бай бәйрәм

Бәйрәм чарасы җыр-биюләр, матур теләкләр һәм күңелле очрашулар белән үрелеп барды. Авыл җирлекләренең мәдәният йортлары хезмәткәрләре интернатта яшәүчеләргә күптөрле концерт номерлары бүләк итте.

Бәйрәмгә Татарстанның халык артисты, якташыбыз, Богады авылында туып-үскән моңлы җырчы Азат Хөсәенов та килгән иде. Ул өлкәннәр алдында чыгыш ясап, моңлы һәм дәртле җырлары белән аларның күңелен күтәрде. Җырчыны Пучыда чыгыш ясарга бар татар дөньясына танылган «Баламишкин» гармунчылар ансамбле чакырган.

Шәбезбаш авыл клубы мөдире Рәмилә Хамматуллина бәйрәмне кызыклы итүгә бар көчен куйды. Ул өлкәннәр белән төрле уеннар, күмәк биюләр оештырды. Районыбызның ятим өлкәннәре өчен матур программа әзерләве мактауга лаек.

Һәр кешегә игътибар һәм кайгырту

Бүген Пучы картлар һәм инвалидлар йортында 62 кеше яши. Аларның 59ы бюджет хисабына, ә өч кеше — туганнары түләве исәбенә тәрбияләнә.

Интернатта яшәүчеләрнең барысының да инвалидлык төркеме бар. Аларга кирәкле техник реабилитация чаралары күрсәтелә, көндәлек тормышта тиешле ярдәм оештырыла.

Учреждениедә иң өлкән яшәүчегә 93 яшь булса, иң яшенә якынча 52 яшь. Биредә шулай ук эшкә сәләтсез алты кеше тәрбияләнә.

62 кешене карау һәм аларга хезмәт күрсәтү өчен учреждениедә 30 белгеч һәм хезмәткәр эшли. Коллективта табиб, өч шәфкать туташы, социаль эш буенча белгеч, юрисконсульт, тәрбиячеләр, хисапчы, нянялар һәм санитарлар хезмәт куя. Көн саен яшәүчеләрне тәрбияләүдә ике санитар чиратлашып эшли.

Пучы картлар һәм инвалидлар йортында өлкәннәрнең тормышын мөмкин кадәр уңайлы һәм эчтәлекле итүгә зур игътибар бирелә. Бәйрәм көннәрендә исә бу йортта яшәүчеләр аеруча күп җылы сүзләр, игътибар һәм матур мизгелләр кабул итә.

Өлкәннәр көненә багышланган чара да шуның ачык мисалы булды. Авыл җирлекләре башлыклары, мәдәният хезмәткәрләре һәм иҗат коллективлары өлкәннәрне котлап, күчтәнәчләр һәм концерт номерлары белән килгән. Бәйрәм җыр-моң, елмаюлар һәм ихлас аралашу белән истә калды.