Актанышның гуманитар гимназия-интернатында «Засветись» акциясе үтте

Юл хезмәткәрләре балаларга караңгы вакытта яктылык кайтаргыч элементларын куллануның әһәмиятен җентекләп аңлаттылар. 2025 елның ун ай нәтиҗәләре буенча республикада 11 җәяүле һәлак булган, күп очраклар игътибарсызлык һәм күренмәү сәбәпле килеп чыккан.

Укучыларга юлда сак булырга, яктылык кайтаргыч элементлы браслетлар, значоклар, наклейкалар яки махсус киемнәр кулланырга киңәш ителде. Балалар дәресне җанланып тыңладылар, сораулар бирделәр, юл хәрәкәте кагыйдәләре турында буклетлар һәм яктылык кайтаргыч элементлар алдылар. Әгәр бала яктылык кайтаргыч элементлары булмыйча юл-транспорт һәлакәтенә эләксә, җаваплылыкны аның ата-анасы яки законлы вәкилләре ала, чөнки алар балаларның иминлеген тәэмин итәргә һәм юл кагыйдәләрен үтәүгә күзәтчелек итәргә тиеш.

Акция укучылар тарафыннан әзерләнгән күңелле флешмоб белән тәмамланды, ул алган белемнәрне ныгыту һәм юлларда куркынычсызлыкка игътибар җәлеп итүгә юнәлтелде.