Бүген Актаныш районы ЗАГС бүлегендә 14 яше тулган яшь райондашларыбызга паспорт тапшыру тантанасы булып узды. Салтанатлы чарага 8 егет һәм кыз әти-әниләре белән бергәләп килде — алар өчен бу көн гомерлек истәлеккә әйләнәчәк, чөнки нәкъ менә шушы мизгелдә алар үзләренең беренче мөһим документларын кулларына алды.
Актаныш районы башлыгы Ленар Зарипов балаларга туган илебезнең лаеклы гражданнары булып үсәргә чакырды:
«Үсәсез, мөстәкыйльлеккә ирешәсез, ләкин кешелеклелекне һәм үз җирегезгә мәхәббәтне йөрәгегездә саклагыз. Россия Федерациясендә яшәвегез белән горурланыгыз. Махсус хәрби операциядәге солдатларыбыз җаннарын биреп көрәшә — аларга тугры калыгыз, башыгызны горур тотып, Актанышның лаеклы уллары һәм кызлары булып яшәгез», — диде ул.
РФ Эчке эшләр министрлыгының Актаныш районы буенча бүлеге җитәкчесе вазыйфаларын башкаручы Айзат Тимиров яшьләрне паспорт алу көне белән котлап, документның аеруча әһәмиятле булуын искәртте:
«Паспорт — ул сезнең йөзегез, шуңа күрә аны сакларга кирәк», — дип ассызыклады ул.
«Бердәм Россия» партиясенең Актаныш районы җирле бүлекчәсе җитәкчесе Зәһинә Исламова яшь гражданнарны котлап, аларга Татарстан Конституциясе китапчыкларын тапшырды.
Чара ахырында район ЗАГС бүлеге мөдире Гөлфинә Мөхәммәдиева район ЗАГС бүлегенең эшчәнлеге белән таныштырды һәм яшьләрне киләчәктә дә актив гражданлык позициясендә булырга чакырды.
Бу көн яшь актанышлылар өчен зур тормышка беренче җитди адым— алар инде хәзер үз иле, үз республикасы һәм үз районы алдында тоткан җаваплылыкны тоя.
Нет комментариев