Бүген Актанышта районкүләм өмә уза

Җир өстенә түшәлгән яфраклар — көзнең алтын матурлыгы, ләкин аларның яме тиз бетә шул. Урамнарны һәм ишегалларын яфраклардан чистартуның мөһим сәбәпләре бар: коелган яфраклар эстетик кыяфәтен югалта, чери һәм үзенә пычрак җыя, яңгырлар вакытында черек яфраклар урамнарны пычрата, яфраклар яңгыр сулары ага торган коеларга һәм торбаүткәргечләргә тыгылырга мөмкин, бу су басуга һәм коммуникацияләр эшчәнлеге бозылуга китерә.

Безнең "Актаныш-информ" коллективы да бинабыз янында һәм бүлеп бирелгән участокта- Ленин проспектындагы 38 нче йорт янәшәсендә яфракларны җыештырды. Бу авылыбызны чистартуга өлеш кертү генә түгел, ә хезмәттәшләр белән якыннан аралашу, үзара дуслык мөнәсәбәтләрен ныгыту өчен дә бик яхшы мөмкинлек.

Өмә көннең икенче яртысында да дәвам итә, ә ял көннәрендә авылдашларыбыз шәхси хуҗалыклары тирәсен кышка әзерләп куяр дигән ышанычта калабыз.