Әтәс мәктәбендә ветеран укытучыларның җылы очрашуы узды

Очрашуга өлкән буын укытучылары бик теләп җыелды. Аларның сөйләшер сүзләре, уртак хатирәләре, әйтер фикерләре шактый күп иде. Еллар узса да, күңелләр яшь, рухлары көр булган мөгаллимнәр бер-берсе белән очрашып, ихлас аралашудан зур канәгатьлек алдылар.

Чара барышында укытучылар үзләренең сәләтләрен дә күрсәттеләр: араларында җырчылар да, гармунчылар да, шигырь язучылар да табылды. Алар дәртләнеп җырладылар, истәлекле вакыйгаларны искә төшерделәр, рәхәтләнеп күңел ачтылар.

Очрашуда районыбызда күпләргә таныш булган Фәһим һәм Марсель абыйлар, Лилия Гыйлемнәр кебек хөрмәтле укытучылар да катнашты. Аларның һәркайсы гомерләрен балаларга белем һәм тәрбия бирүгә багышлаган фидакарь затлар.

Без әлеге хөрмәтле укытучыларыбызга алдагы көннәрдә дә ныклы сәламәтлек, күңел тынычлыгы, бәхетле һәм озын гомер телибез. Мондый җылы, ихлас очрашулар алга таба да дәвам итсен, күңелләрне баетсын иде.

Әлеге чара турында Әтәс авылы китапханәчесе Мәүҗидә Гарипова хәбәр итте.