Карга боткасы- Бу язның иң матур хәбәре!

 «KARGAFEST- ОЯFEST»- «Карга боткасы» бәйрәмен оешма-предприятиеләрдән, авыллардагы клублардан килгән командалар парады башлап җибәрде.

Актанышның балалар бакчалары, мәктәпләрен «Алтынчәч» карлыгачлары («Алтынчәч» балалар бакчасы), «Ромашка карлыгачлары»(«Ромашка» балалр бакчасы), «Умырзая сандугачлары»(«Умырзая» балалар бакчасы), «Саескан» командасы («Кояшкай» балалар бакчасы), «Каенкай сандугалары» («Каенкай» балалар бакчасы), «Тылсым аккошлары» («Тылсым» балалар бакчасы), «Ләкләк-бәхет кошлары»(Әтәчкәй балалар бакчасы), «Каргабикәләр» (гимназия), «Тынычлык кошлары» (Актанышның икенче санлы мәктәбе), «Саескан Number one №1» (Актанышның беренче санлы мәктәбе) командалары тәкъдим итте. 

Кәзкәй, Аеш, Актанышбаш клубларының «Атаказ»,Татар Суыксуы, Күҗәкә клубларының «Сыерчык», Бурсык, Такталачык, Татар Ямалысы, Чалманарат клубларының « Агыйдел акчарлары», «Уразай, Теләкәйнең «Күгәрчен», Сәфәр, Аккүз, Кировның «Сандугач», Яңа Әлем, Пучы, Усы, Иске Айманның «Аккошлар»,  Байсар, Богады, Киров, Чуракай, Югары Яхшыйның «Карга» командалары да район үзәге командаларыннан калышмыйча үзләренә генә хас киемнәрдән район халкын бәйрәм белән сәламләп мәйдан аша узды. 

«Бүләк» базасы мәйданына яңача эчтәлекле бәйрәмне тамаша кылырга килүчеләр бик күп иде. Командаларны, алар барысы 18, олысы-кечесе алкышлап каршылады. 

«Бүләк» спорт базасы мәйданында уза торган  "KARGAFEST- ОЯFEST"- "Карга боткасы" бәйрәменә килүчеләрнең һәрберсен әле генә пешеп чыккан кайнар боткалар белән сыйладылар. Берочтан өстәлләрдә татар халкының милли ризыклары- тәбикмәк, коймаклар, кабартмалар урын алган. Чәйне дә шунда ук ясап биреп сыйлап җибәрәләр. Мондый тәмле карга боткасын авыз итмәгән бер генә кунак та калмагандыр. 

Районыбызның мәдәният хезмәткәрләре Карга боткасын ачып Актаныш вакыйгалары белән бәйләп кызыклы тамаша күрсәттеләр, халыкны көлдереп, шаяртып алдылар. Карга боткасы йоласын саклап ел саен авыл белән бергә үткәрүче Каентүбә кызлары исә Карга боткасы әләмен күтәрделәр, бәйрәм тарихы белән таныштырдылар.  Актаныш районы башлыгы Ленар Зарипов сәламләде. Үз чыгышында Ленар Рафак улы элек-электән әби-бабаларыбыздан килгән борынгы йоланы саклауның мөһимлеген билгеләде.

- Кара каргалар яз алып килүче кошлар. Кошлар кебек, май ялларына балаларыбыз, кунаклар туган якларга кайта. Май бәйрәмендә халкыбызны берләштереп Карга боткалары үткәрелә. Бу бәйрәмнең ничек узасын бирегә килгәч кенә күрдем. Мондый бәйрәм гаиләләр белән бергәләп матур итеп ял итү традициясенә әйләнсен иде.

 Нигә башкалар яуда вакытта бәйрәм үткәрәсез, диючеләр бар. Бәйрәмнәрне дә үткәрергә кирәк. Безнең кәефебез, күңелебез көр булырга тиеш. Егетләребезгә ярдәм итәр өчен, аларның гаиләләренә булышыр өчен без бердәм булып бәйрәмнәрне бергәләп уздырырга тиеш. Дөньяларыбыз имин булсын, егетләребез исән-сау әйләнеп кайтсын. Без аларны сагынабыз, алар белән горурланабыз. Бүгенге бәйрәмдә басу-кырларда еллык уңышка нигез салучы авыл хуҗалыгы хезмәтчәннәренә дә зур рәхмәтләремне җиткерәм, – диде Ленар Рафак улы. 

 «KARGAFEST- ОЯFEST»- «Карга боткасы» җәйге сезонны ачу бәйрәме дә булып тора. быелгы җәйдә райондашларны бик күп күмәк чаралар, проектлар көтә, аларның барысы да авыл халкын көндәлек эш -мәшәкатьләрдән арындырып ял иттерү, позитив фикерләүгә тарту, киләчәккә якты өметләр белән яшәргә чакыруны максат итеп куя.

 

Бөтендөнья татар конгрессының башкарма комитеты җитәкчесе урынбасары Ирек Шәрипов  конгресс тарафыннан Татарстан Республикасы районнарына бер милли йола-бәйрәмне зурлап оештыру бурычы куелганлыгын әйтте.

- Кояш та беренче булып Актаныштан чыга, төрле яңалыклар да сездә барлыкка килә. Бүген республикада җәйге бәйрәмнәрне Карга боткасы башлап җибәрә. Карга боткасыннан соң көннәр дә җылыта, дөнья яшәрә, басуларда яңа игенгә нигез салына, май бәйрәмнәрендә әти-әниләребез яткан зиратларны чистартырга туган якка кайтабыз. Карга боткасы балаларның да яраткан бәйрәме ул.  

Бөтендөнья татар конгрессы һәрбер районның үзенә генә хас зурлап үткәрә торган бәйрәмен булдыру максат итеп куйды. Мөслимнәр зурлап Каз өмәсе уздыра, Сарманда да бик матур проект барлыкка килде. Ә республикада җәйге бәйрәмнәрнең иң беренче  булып Актаныштан башлануы бик матур күренеш. Карга бик яхшы кош ул, ул бит яз хәбәрчесе. Язның иң матур күренеше күз алдында- басуда ДТ тракторы җир сукалап бара, ә аның артыннан көтүе белән кара каргалар сикергәли. Бу язның иң матур хәбәре. Тормышыбызда да алга таба яхшы хәбәрләр күп, гаиләләрегездә тынычлык, йортларыгызда бәрәкәт  булсын,- диде  Ирек Илдус улы.