ТР Яшьләр хөкүмәте экологик һәм мәдәни проектларны хуплады

Көн тәртибенең төп өлеше өч проектны гамәлгә ашыру турында фикер алышуга багышланды. Алар яшьләрнең иҗади потенциалын үстерүгә, экологик аң-белем бирүгә һәм республикабызның мәдәни мирасын популярлаштыруга юнәлдерелгән: «Татарстан тавышлары», «Яшел десант» һәм «Казан мәчеләре».

«Яшел десант» экологик инициативасы авторы һәм җитәкчесе, КДЭУның өченче курс студенты Артем Хазиев үз проектын тәкъдим итте. Ул Татарстан шәһәрләре һәм бистәләрен яшелләндерүгә, шулай ук яшьләр арасында экологик культура формалаштыруга юнәлдерелгән. Проект практик эшчәнлекне аңлату-агарту чаралары белән берләштерәчәк, чөнки урманнарны саклау глобаль дәрәҗәдә дә, көндәлек тормышта да игътибар таләп итә.

Хазиев сүзләренчә, проект кысаларында электр линияләре астында яки торба үткәргечләргә якын урнашкан яшь агачларны куркынычсыз урыннарга күчереп утырту планлаштырыла. Шулай итеп, кимендә йөзгә якын үсентене саклап калу мөмкин булачак. Моннан тыш, 9–12 яшьлек мәктәп укучылары өчен экологик дәресләр үткәрү каралган, алар балаларда урманны саклау кыйммәтләрен иҗади алымнар аша тәрбияләүгә юнәлтеләчәк. Шулай ук 18–35 яшьлекләр өчен «Россия тыюлыклары» дигән интеллектуаль квиз оештырылачак. Барлык чараларның гомуми колачы кимендә 140 кешене тәшкил итәчәк.

Проект авторы «Яшел десант»ның Татарстанның чиста киләчәгенә өлеш булуын ассызыклады һәм теләгән һәркемне акцияләргә кушылырга чакырды.

Утырышта тәкъдим ителгән тагын бер инициатива – «Казан мәчеләре» мәдәни-агарту проекты булды. Аның турында башкарма директор Полина Атеева сөйләде. Проект кысаларында Казанның төп истәлекле урыннары янында урнаштырылачак 15 бронза мәче сыныннан торган туристик маршрут булдыру планлаштырыла. Һәр сын билгеле бер урын белән бәйле булачак, үзенчәлекле позасы, символы һәм легендасы булачак. Шәһәр тарихы белән QR-кодлар аша танышып булачак. Әлеге маршрут шәһәр буйлап йөрүне кызыклы квест-уенга әйләндерәчәк һәм Казанның яңа символын формалаштырыр дип көтелә.

Фикер алышу барышында катнашучылар «Татарстан тавышлары», «Яшел десант» һәм «Казан мәчеләре» проектларының Яшьләр хөкүмәтенең төп юнәлешләренә – иҗат, экология һәм мәдәнияткә туры килүен билгеләп үттеләр. Шулай ук яшьләргә үзләрен күрсәтү өчен реаль мөмкинлекләр тудыру һәм аларны төбәкнең актуаль мәсьәләләрен хәл итүгә җәлеп итү мөһимлеге ассызыкланды.