Татарстанда ел башыннан су объектларында 31 кеше һәлак булган: Актаныш районы халкына куркынычсызлык кагыйдәләрен искә төшерәләр

Моннан тыш, кече үлчәмле суднолар катнашындагы һәлакәтләр дә арткан. Ел башыннан алып мондый 10 очрак теркәлгән, нәтиҗәдә 7 кеше һәлак булган.

Коткару хезмәтләре мәгълүматлары буенча, фаҗигаләрнең төп сәбәпләре – көймәләр һәм су мотоцикллары белән исерек хәлдә идарә итү, караңгы вакытта суга чыгу, шулай ук коткару жилетларын кулланмау.

Коену сезоны кызган чорда Актаныш районы халкына су объектларында куркынычсызлык кагыйдәләрен төгәл үтәү мөһимлеге тагын бер кат искә төшерелә.

Су объектларында куркынычсызлык кагыйдәләре:

• Су коену өчен махсус җиһазландырылган һәм рөхсәт ителгән урыннарны гына сайлагыз.
• Исерткеч эчемлекләр кулланган хәлдә суга кермәгез.
• Балаларны су буенда караучысыз калдырмагыз.
• Көймә, катер яки су мотоциклына утырганда коткару жилеты киегез.
• Караңгы вакытта һәм һава шартлары начар булганда суга чыкмагыз.

Гади генә куркынычсызлык кагыйдәләрен үтәү күп кенә фаҗигаләрне булдырмый калырга мөмкин.

Су өстендә гадәттән тыш хәлгә юлыксагыз, 112 бердәм ашыгыч хезмәт номерына хәбәр итегез.