Хезмәтенең нәтиҗәсе татлы
Үз тырышлыгы белән тормышның югары баскычларына күтәрелгән, районыбыз авыл хуҗалыгын үстерүгә лаеклы өлеш кертеп, "Татарстанның атказанган агрономы" исемен горур йөртүче Гөлсайра Әхияр кызы Бәшәрова 70 яшьлек юбилеен каршылый. Теләкәй авылында Әхияр абый белән Таҗибә апа гаиләсендә 12 баланың унберенчесе булып дөньяга аваз сала ул. Кечкенәдән эш яратып үсә. Бер эштән...
Үз тырышлыгы белән тормышның югары баскычларына күтәрелгән, районыбыз авыл хуҗалыгын үстерүгә лаеклы өлеш кертеп, "Татарстанның атказанган агрономы" исемен горур йөртүче Гөлсайра Әхияр кызы Бәшәрова 70 яшьлек юбилеен каршылый.
Теләкәй авылында Әхияр абый белән Таҗибә апа гаиләсендә 12 баланың унберенчесе булып дөньяга аваз сала ул. Кечкенәдән эш яратып үсә. Бер эштән дә курыкмагангамы - әтисе аны һәрвакыт үз янындарак йөртергә тырыша. Кыскасы, ирләр эше дип тормый, һәрнәрсәгә кулы ята кызның. Шуңадырмы - урта мәктәпне тәмамлагач, туп-туры Минзәлә авыл хуҗалыгы техникумына юл тота. Аны уңышлы тәмамлап, авылга кайта. Районыбыз авыл хуҗалыгының төрле тармакларында көч куя. Кайда гына эшләсә дә, аны яраталар, үз итәләр.
Эшкә оста, чибәр кызга күп егетләрнең күзе төшсә дә, Гөлсайра булачак тормыш иптәше итеп Зөфәрне сайлый. Гөрләтеп туй итәләр. Уллары Ленар дөньяга килә. Эш сөючән, тынгысыз Зөфәр, өй салу нияте белән, урманга чыгып, бүрәнә алып кайта. Шуны эшкәртеп йөргәндә, кысылып, вакытсыз вафат була. Улын күкрәгенә кысып, күз яшьләрен эчкә йотып, Гөлсайра тол кала. Бирешмәскә, алга карап яшәргә, дигән максат куя ул үз алдына. 5 яшьлек улын җитәкләп, Казан авыл хуҗалыгы институтының икътисад бүлегенә имтихан тапшырырга китә. Читтән торып аны уңышлы тәмамлый. Районыбыз авыл хуҗалыгы идарәсендә икътисадчы булып эшли башлый. Кайда гына хезмәт куйса да, гади халыкны аңлавы, ярдәмчеллеге, кеше хәленә керә белүе белән ихтирам казана.
1994 елда аны район орлыкчылык инспекциясенә җитәкче итеп билгелиләр. Иң беренче эше итеп ул җиргә сеңгән, салкын бинаны яңарту эшенә тотына. Тырышлыгы бушка китми, Актанышыбызны ямьләп, ап-ак бина хасил була. Бердәм коллектив туплый. Эш сәгате белән хисаплашмый, көне-төне хуҗалыкларда йөреп, орлыкларның сыйфатлылыгына ирешә. Лаеклы ялга киткәнче шунда тырыш хезмәт куя. Ветеранның 46 ел хезмәт стажы бар. Атказанган агроном исеменә лаек була, ә аңа бирелгән мактау кәгазьләрен санап бетерерлек түгел.
Районда ул белмәгән, аны танымаган кеше бар микән? Ахирәтем буларак, мин аның белән еш аралашам, һәм көннән-көн аның игътибарлылыгына, кешелеклелегенә кабат-кабат сокланам. Кешеләрне ярата ул. Тынгысызлыгы, эш сөючәнлеге һаман кимемәгән. Үзе салган йорт янында җиләк-җимеш, бәрәңге, төрледән-төрле агачлар үстереп мәш килеп ята. Аның капкасы һәркемгә ачык. Балалары, туганнары, дуслары белән аралашып яши.
Көчле ихтыярлы Гөлсайраның балалары да, үзенә охшап, уңган-булганнар. Улы Ленарның үз бизнесы. Хатыны Гөлнара белән матур итеп көн күрәләр, ул-кызлары үсеп килә. Римма исә, югары уку йортын тәмамлап, Казанда банкта баш белгеч булып эшли.
Әйе, Гөлсайра бик бәхетле бүген. Тырыш хезмәтенең җимешләрен татый. Һәр туган таңга рәхмәт әйтеп, Ходайдан сәламәтлек сорап, илебезгә тынычлык теләп каршылый ул юбилеен. Амин, теләкләрең кабул булсын, дустым!
Карашларың җылы яңгыр кебек,
Елмаюың айдай сөйкемле.
Шәфкатеңнең иге-чиге юк бит,
Кояш чәчкән нурлар шикелле.
Ак бәхетләр юлдаш булсын сиңа,
Көннәреңне шатлык бизәсен.
Сәламәтлек үзе бәхет бит ул,
Ходай шуннан мәхрүм итмәсен.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
