Актанышта балалар иҗат итә, аларга юл күрсәтүче укытучылар бар

Алина Ринатовна фестиваль белән якыннан танышып, укучыларның, студентларның эшләрен карап чыкты һәм үзенең тәэсирләре белән уртаклашты:

— Мин, чыннан да, техник иҗатның шундый яхшы темплар белән үсүенә бик шатмын. Безнең өчен Актаныш районы аеруча әһәмиятле. Чөнки нәкъ менә шушы районда техник иҗат үсешенә башлангыч салынды: муниципаль районнарга бирелгән грантлар да шуннан старт алды.

Бирегә килеп, барысын да үз күзләрем белән күрү — зур шатлык. Һәр эш, һәр экспонат үзенчә әһәмиятле, мәгънәле. Карап туеп булмый — барысы да бик матур, уйлап эшләнгән. Республика этабында да катнашкан эшләрне күрү аеруча сөендерә.

Иң мөһиме — балалар иҗат итә, ә аларга юл күрсәтүче укытучылар бар. Моннан тыш, җитәкчелекнең дә бу юнәлешне хуплавы бик әһәмиятле. Чөнки нәкъ менә шушы факторлар теләсә кайсы балалар иҗатының нигезен тәшкил итә.

Шуңа күрә мин биредә булуыма бик шат, барыгызны да ихлас сәламлим, — дип билгеләп үтте ул.

Фестиваль тагын бер кат раслады: Актаныш районында техник иҗатка зур игътибар бирелә, ә яшь буынның сәләтен үстерү өчен барлык мөмкинлекләр дә тудырылган.