Казанда Татарстан авыл хуҗалыгы министрлыгының элекке хезмәткәре Зариповны «юк атлар» өчен хөкем иттеләр

Вахитов районы суды (Казан) министрлыкның нәсел эше буенча баш идарәсен җитәкләгән Ришат Зариповны гаепле дип таныды һәм аны 3 елга ирегеннән мәхрүм итү турында хөкем карары чыгарды. Бу турыда республика прокуратурасы хәбәр итә.

Тикшерү версиясе буенча, Зарипов катнашындагы афера югары нәселле атларны сатып алу турындагы ялган килешүләргә нигезләнгән. Ул документларга үз имзасын куя, ә әлеге кәгазьләрне башка җинаятьчеләр Татарстан Авыл хуҗалыгы министрлыгына тапшырып, кыйммәтле атлар бәясенең 85 процентын кайтару өчен субсидияләр алган. Чынлыкта исә атлар бары тик документларда гына «сатып алынган». Хокук саклау органнары әлеге субсидияләрне үзләштерү схемасын «Казан» нәселле атлар заводы җитәкчесе Марат Гильфанов уйлап тапкан дип фаразлый.

Прокуратура мәгълүматларына караганда, Зарипов җитәкләгән учреждение — дәүләт казна учреждениесе «Терлекчелектә нәсел эше буенча төп идарә» — законсыз рәвештә «Казан нәселле атлар» оешмасына нәселле  атлар сатып алу һәм нәселле терлекчелекне үстерү өчен субсидияләр бүлеп биргән. Бу гамәлләр Татарстан бюджетына 17 миллион сумнан артык зыян китергән.

Суд Зариповка 2 ел дәвамында оештыру-хуҗалык яки идарә итү функцияләре бәйле булган дәүләт вазифаларын биләүне дә тыйды.