Актаныш районында юл хәрәкәте иминлеге комиссиясенең киңәйтелгән утырышы узды

Утырышны комиссия рәисе — Актаныш муниципаль районы Башкарма комитеты җитәкчесе Бариев Илфак Шамил улы алып барды.

Комиссия эшендә аның әгъзалары, авыл җирлеге башлыклары, шулай ук мәктәп директорлары катнашты.

Көн тәртибендәге төп мәсьәләләр

Иң элек Актаныш районы буенча Россия Эчке эшләр министрлыгы бүлегенең Дәүләт автоинспекциясе (ЮХИДИ) бүлеге җитәкчесе Шәмсиев Ренат Радик улы чыгыш ясады.

Ул:

• 2025 ел нәтиҗәләре буенча аварияләр торышына анализ ясады;

• 2026 елның гыйнвар ае күрсәткечләрен узган елның шул ук чоры белән чагыштырды;

• район территориясендә теркәлгән юл-транспорт һәлакәтләре һәм аларның авыр нәтиҗәләрен киметү буенча күрелә торган чаралар;

• кышкы чорда автомобиль юлларын һәм урамнарны карап тоту, эксплуатацияләү һәм юл эшләренең барышы турында мәгълүмат бирде.

Юл хәрәкәте торышын контрольдә тоту өлкәсендәге яңалыклар турында Яр Чаллы шәһәрендәге «Юл хәрәкәте иминлеге» дәүләт бюджет учреждениесенең территориаль идарәсе җитәкчесе Гыйльмутдинова Резеда Рәҗәп кызы сөйләде. Ул хокук бозуларны фото-видеофиксацияләү системасындагы яңалыклар белән таныштырды.

Шулай ук «ТАТМЕДИА» АҖ филиалы — «Актаныш мәгълүмат-мөхәрририят үзәге» җитәкчесе Гыймадиев Айнур Рәсим улы чыгыш ясады. Ул 2025 елда район массакүләм мәгълүмат чаралары тарафыннан юл хәрәкәте иминлеген пропагандалау юнәлешендә башкарылган эшләр турында хәбәр итте.

Утырыш йомгаклары буенча Актаныш муниципаль районы территориясендә юл хәрәкәте иминлеген тагын да арттыруга юнәлтелгән өстәмә чаралар билгеләнде.