Еллар аша сыналган хезмәт

Бүгенге көндә ул заманча техника — John Deere тракторы белән эшли. Аның төп бурычы — чабылган печәнне вакытында кабартып, киптерү процессын дөрес оештыру. Бу эш зур игътибар, төгәллек һәм тәҗрибә таләп итә, һәм Илдус Галиев бу вазыйфаны югары дәрәҗәдә башкара.

Үзе сөйләгәнчә, хезмәт юлын ул гади техникаларда башлап җибәрә: башта МТЗ-82 тракторында эшли, аннары 12.21 моделенә күчә. Быел исә аңа John Deere тракторы ышанып тапшырылган. «Мин бу техниканы күптән сорап йөри идем, ниһаять, бирделәр», — дип елмаеп искә ала ул.

Терлек азыгы әзерләү өлкәсендә аның тәҗрибәсе зур: гомер буе диярлек печән һәм салам пресслау белән шөгыльләнгән. Шуңа күрә яңа техникага ияләшү дә авырлык тудырмый. «Бу — кеше өчен эшләнгән, уңайлы, заманча техника», — ди ул.

Хәзерге вакытта Илдус Галиев сенаж әзерләү комплексында эшли. Басуда эш болай оештырылган: Раил Зарипов Deutz-Fahr тракторы белән үләнне чаба һәм аны тигез рәтләргә — пакосларга сала. Ә Илдус Галиев, аның артыннан барып, шул чабылган массаны җыеп, тиешле урынга төяп бара. Ул агрегатларның төзек эшләвен билгеләп үтә: «Агрегатлар шәп эшли, барысы да җайлы. Без бер-беребезгә ияләшеп эшлибез», — ди ул.

Хезмәттәшләре дә аны тырыш, сабыр, эшен белеп башкаручы белгеч буларак бәяли. Кыр эшләренең киеренке чорында да Илдус абый һәрвакыт күтәренке кәеф белән, җаваплылык тоеп эшли.

Аның кебек тәҗрибәле механизаторлар ярдәмендә «Әнәк» агрофирмасында терлек азыгы әзерләү эше югары сыйфат белән һәм вакытында башкарыла. Бу исә хуҗалыкның тотрыклы үсешенә нигез булып тора.