«Әнәк» агрофирмасы басуларында: техника һәм тырыш хезмәт бергә

Ике еллык люцерна басуы уртасында механизатор Раил Зариповны туктатып, аның белән кыскача әңгәмә кордык. Аның һәр минуты кадерле — игенче эш вакытын бушка уздырырга яратмый.

— Мин агрофирмада 2009 елдан бирле эшлим, — дип башлады ул сүзен. — Элегрәк «Макдон» комбайнында эшләдем, башка техникаларда да тәҗрибәм бар. Быел исә мине яңа техникага — сенаж әзерләү агрегатына күчерделәр.

— Нинди техника соң бу? — дип кызыксындык без.

— Без хәзер Deutz-Fahr тракторы белән эшлибез. Ул сенаж салу өчен махсус агрегат белән җиһазландырылган заманча техника. Әлеге комплекс сенаж әзерләү өчен билгеләнгән: үләнне чаба, аны тигез рәтләргә — пакосларга сала. Бу сенаж әзерләү өчен билгеләнгән комплекс. Иртәннән үк кереп китеп, шактый мәйданны чабып чыгып була.

— Бу агрегат ничә метр киңлекне берьюлы чаба ала?

— Әлеге агрегат берьюлы 9 метр киңлектә үләнне чаба.

— Пакосларны ничек сала?

— Ул берьюлы өч пакос ясый ала. Кирәк булса, бер генә пакос калдырырга да мөмкин. Әмма без өчле вариантны кулланабыз, чөнки ул үләннең тизрәк җилләвенә ярдәм итә.

— Техникадан канәгатьме?

— Әлбәттә, техника бик яхшы. Чит илнеке булгач, сыйфаты да югары.

— Быел үләннәрнең куелыгы ничек?

— Быел яңгырлар күп булды, шуңа күрә үләннәр бик әйбәт, куе булып үсте. Масса да күп — эшләргә дә, эшләргә генә!

— Көненә күпме мәйданда чабасыз?

— Бу инде арттан килгән техникаларга бәйле. Ашыкмыйча, үләнне тиешенчә кибәрлек итеп, көненә якынча 50 гектар эшләргә була. Артык ашыгып булмый, чөнки сыйфат та мөһим.

— Рәхмәт сезгә, уңышлар телибез!

Агрофирмада эш кайный, һәркем үз урынында тырышып хезмәт куя. Терлек азыгын сыйфатлы итеп әзерләү — киләчәк уңышының нигезе бит.