Актаныш кызы Риана Хәбибуллина Уфада узган халыкара «Торнадо» фестивалендә җиңү яулады

Бу мәртәбәле сәхнәдә Актаныш районы данын яклап, «Шатлык» бию коллективы солисткасы Хәбибуллина Риана Рузил кызы чыгыш ясады. Ул үзенең югары дәрәҗәдәге әзерлеге, сәхнә культурасы һәм образны оста бирә белүе белән жюрины таң калдырды.

Көчле көндәшлек шартларында Риана иң югары нәтиҗәгә ирешеп, I урынга лаек булды. Бу — зур хезмәт, тырышлык һәм остазларның дөрес юнәлеш бирүе нәтиҗәсе.

Риана — Актанышның икенче санлы мәктәбе укучысы. Ул кечкенәдән үк бию сәнгатенә гашыйк булып, үзенең максатчанлыгы, тырышлыгы белән зур уңышларга ирешә. «Шатлык» коллективында шөгыльләнеп, ул инде берничә бәйге һәм фестивальләрдә катнашып, тәҗрибә тупларга өлгерде.

Әлеге җиңү — Риананың шәхси казанышы гына түгел, ә Актаныш районы өчен дә зур горурлык. Мондый уңышлар яшь буынның сәләтен үстерүгә зур игътибар бирелүен, балаларга иҗади мөмкинлекләр тудырылуын тагын бер кат раслый.

Киләчәктә дә Рианага яңадан-яңа җиңүләр, иҗади уңышлар телибез!