Актанышта җитезләр, көчлеләр, дәртлеләр билгеләнде

Волейбол, бадминтон, алкалы хоккей, шахмат, өстәл теннисы ярышлары инде декабрь-гыйнвар айларында ук башланган булса, бу көнне, шуларга өстәп, чаңгы һәм тимераякта узышу, кул көрәше, гер күтәрү, аркан тартышу, дартс, йөзү һәм турникта тартылу буенча көч сынашты командалар. Алары исә оешмалар арасыннан 21, район үзәге мәгариф учреждениеләреннән 7 һәм барлык җирлекләрдән иде. Бүләктә чаңгы ярышы белән башланган бәйгеләргә нәтиҗәне "Актаныш" спорт комплексында ясадылар. Район башлыгы һәм район хакимияте җитәкчеләре җиңүче командаларны котлады. Иң-иңнәр кыйммәтле бүләкләргә ия булдылар.

I урында - кече нефть компаниясе,

II урында - "Коммунсервис-Актаныш" ҖЧҖ,

III урында - Түбән Кама сусаклагычын эксплуатацияләү идарәсе командасы.

I урында - "Иман" балалар һәм яшүсмерләр спорт мәктәбе,

II урында - Актанышның 1нче мәктәбе һәм

III урында - технология техникумы.

Авыл җирлекләре арасында исә беренчелекне Пучы җирлеге яулады.

II урында - Татар Суыксуы,

IIIдә - Иске Байсар җирлеге командалары.

Җиңүчеләргә теннис өстәленә сертификат, II урынга лаекларга 4 чаңгы комплекты, III урынны яулаганнарга исә футбол-волейбол туплары җыелмасы тапшырылды.

Бүген туган авылым Кәзкәй командасы өчен шудым. Казанда укыйм, авылга күптән кайткан юк иде. Спартакиадага дип махсус туры китереп түгел, бераз озаграк торыйм дип кенә атна уртасында ук кайткан идем.

Чаңгы спортына мин абыем Рөстәмгә ияреп килдем. Җиңүләрем, яхшы нәтиҗәләрем артында исә беренче чиратта остазым Галимҗан абый Мансуров тора. Кышкы матур рәхәт ял көннәрендә дә чаңгыга чыгарга иренеп ятучыларга, их,тәмен белмисез, рәхәтен тоймыйсыз, дип карыйм. Алга максатлар зурдан: киләсе елга Россиянең җыелма командасы составына эләгергә дип тырышам.

Безнең МНКТ оешмасы спорт чараларында бик теләп катнаша. Оешмада спортчы егет-кызларыбыз, шөкер, күп. Безнең егетләр хоккейда, җәйге спорт төрләреннән мини-футболда җиңүче калдылар. Мин үзем бүген спартакиадада шорт-трек бәйгесендә көчемне сынадым. Ял көннәрендә тимераякта шуарга гаилә белән киләбез. Тырышабыз, коллективны якларбыз, сынатмабыз.

Тимераякка беренче тапкыр Чаллыда яшәгәндә ишегалдындагы һәр йорт каршында ясала торган боз тартмасында баскан идем. Аннан соң күп еллар шуарга туры килмәде. 2007 елда Актанышка эшкә кайткач, "Лачын"га йөри башладым. Вакыт булганда килергә тырышабыз. Мондый ярыш безгә нәрсә күрсәтә: шөгыльләнер өчен даими рәвештә вакыт табарга кирәк, көне килеп җиткәч кенә, монда нидер күрсәтәм, нәрсәгәдер ирешәм, дип йөрүдән файда юк.

Барлык төр ярышларда да катнашырлык итеп җыелып килдек. Мондый спорт чараларында бигрәк тә безнең мәктәп коллективы активлык күрсәтә. Үзем ниятләп, чаңгыга бастым, урап килим әле, дидем. 14 нче килдем. Катнашу кадәресе күңелле.

16 кешелек тулы составтагы команда белән килдек. Мин үзем дартс һәм авыл җирлекләре командалары арасында оештырылган өстәл теннисы уеннарында катнаштым. Спорт белән шөгыльләнү үзебезнең саулык өчен кирәк. Шуңа кичләрен клубка чыгып, теннис уйнарга йөрибез, скандинавия йөреше белән авыл әйләнәбез, чаңгыга чыгабыз.

Үзәк хастаханә командасы хоккейдан башка бар спорт төрләрендә дә катнашты. Призлы урыннан бигрәк, мондый чаралар сәламәтлек өчен бик әйбәт. Спартакиадаларда гына түгел, көн саен нинди дә булса спорт төре белән шөгыльләнү өчен районда бар мөмкинлекләр тудырылган. Спорт объектлары эшли. Алар һәрчак тулып торсын. Мин үзем Актаныш спорт комплексына еш йөрим, вакыт булганда чаңгыда чыгарга яратам.