Балалар иминлеге — даими контрольдә

Районда балигъ булмаганнар белән эшләү комиссиясе системалы рәвештә эш алып бара. Каникуллар һәм озын бәйрәм көннәрендә генә түгел, ә гадәти вакытта да профилактик чаралар өзлексез оештырыла. Район буенча план нигезендә дә, шулай ук планнан тыш та рейдлар үткәрелә. Алар авыл җирлекләрен дә, район үзәген дә колачлый.

— Аеруча игътибар социаль яктан куркыныч хәлдәге, авыр тормыш шартларында яшәүче гаиләләргә бирелә. Кичке рейдлар вакытында белгечләр гаиләләрнең яшәү шартларын карый, балаларның иминлеген тикшерә, — дип билгеләп үтте Ләйсән Мирхәйдәрова.

Моннан тыш, җәйге чорда су коену белән бәйле хәвефләрне кисәтү максатыннан да даими рәвештә профилактик чаралар уздырыла. Балаларның рөхсәт ителмәгән урыннарда су керү очракларын булдырмау — төп бурычларның берсе. Бу юнәлештә авыл башлыкларына, профилактика органнарына һәм җаваплы хезмәт вәкилләренә зур җаваплылык йөкләнгән.

Ләйсән Мирхәйдәрова «төнге вакыт» кагыйдәләренә аерым тукталды. 31 майдан 1 сентябрьгә кадәр 18 яшькәчә булган балаларга кичке 23:00тән иртәнге 06:00гә кадәр ата-ана озатуыннан башка урамда йөрү тыела. Әлеге таләпләрне бозган очракта, ата-аналарга Татарстан Республикасы административ хокук бозулар кодексының 3.11 маддәсе нигезендә протокол төзелә. Бүгенге көндә комиссиягә әлеге маддә буенча инде берничә материал кергән.

Җәйге чорда аеруча еш күзәтелгән хокук бозуларның берсе — таныклыгы булмаган килеш транспорт чаралары белән идарә итү. Яшүсмерләр арасында мотоцикллар, питбайклар, хәтта автомобильләрнең руль артына утыру очраклары арта. Мондый гамәлләр җитди куркыныч тудыра һәм закон тарафыннан катгый контрольдә тотыла.

— Соңгы вакытта электросамокатлар, электровелосипедлар куллану белән бәйле тән җәрәхәтләре алу очраклары  ешайды. Бу — игътибар таләп итә торган мәсьәлә, — дип ассызыклады Ләйсән Мирхәйдәрова.

Чыгыш ахырында ул ата-аналарны балаларга карата игътибарлы булырга, аларның кайда һәм ничек вакыт уздыруын контрольдә тотарга чакырды.

— Балаларыбызның җәйге ялы күңелле генә түгел, имин дә булсын иде. Һәр ата-ана бу мәсьәләдә җаваплылыкны тоеп эш итсен, — дигән теләктә калды ул.