Татарстанга антициклон якынлаша - кырау төшү ихтималы зур

ТР Гидрометоүзәге фаразлавынча, иртәгә, 21 сентябрьдә, аязучан болытлы һава торышы көтелә. Урыны белән бераз яңгыр явуы ихтимал. Җил төньяк-көнбатыштан исә, тизлеге көндез секундына 12 метрга кадәр җитәргә мөмкин. Минималь температура төнлә +7 градусны тәшкил итә. Ә көндез максималь +15..+20 градус булачак.

22 сентябрьдә иртән һәм төнлә урыны белән бераз яңгыр явачак, ә көндез явым-төшем көтелми. Җил көнбатыштан һәм төньяк-көнбатыштан секундына 7-12 метр, урыны белән 15-17 метрга кадәр җитәргә мөмкин. Төнлә һава температурасы +5 градусны тәшкил итә, ә көндез - +11- +16 градус булыр дип фаразлый белгечләр. 

Киләсе атна башында, 23 һәм 24 сентябрьдә республика территориясе антициклон йогынтында булачак. Элеккечә үк салкын һава торышы саклана, көндез температура +11- + 16 градустан югары күтәрелмәячәк. Төнлә температура 0 дән +5 градуска кадәр, ә 24 сентябрьдә кайбер районнарда 0- -3 градус булу ихтималы зур.