Актаныш үзәк хастаханәсендә Камбәр Хабибуллин истәлегенә мемориаль такта ачылды

Актаныш үзәк хастаханәсендә 1964–1986 елларда баш табиб булып эшләгән Камбәр Хәмидулла улы Хабибуллин истәлегенә мемориаль такта ачу тантанасы узды. Чарада район җитәкчелеге, медицина хезмәткәрләре, ветераннар һәм мәртәбәле кунаклар катнашты.

Район медицинасы үсешенә зур өлеш керткән җитәкче

Кәмбәр Хәбибуллин район сәламәтлек саклау системасы үсешенә зур өлеш керткән җитәкчеләрнең берсе булды. Аның җитәкчелегендә хастаханәнең матди-техник базасы ныгыды, яңа корпуслар төзелде, медицина хезмәтен камилләштерүгә һәм белгечләр әзерләүгә зур игътибар бирелде. Таләпчәнлеге, һөнәри осталыгы, яшь табибларга ярдәм итүе белән ул хезмәттәшләренең ихтирамын яулады.

Хезмәте һәм тәҗрибәсе бүген дә әһәмиятле

Район башлыгы Ленар Зарипов чыгышында медицина хезмәткәрләренең фидакарь хезмәтен билгеләп үтте. Ул Кәмбәр Хәбибуллин салган нигезнең бүген дә дәвам итүенә игътибар юнәлтте.

— Больницаның яңартылуы, кабул итү бүлекләренең төзелүе — барысы да халык өчен, кешеләрнең сәламәтлеге өчен эшләнә. Бу хезмәт нәтиҗәләре бездән соң киләчәк буыннарга да калачак, — дип ассызыклады район башлыгы.

Актаныш үзәк хастаханәсенең баш табибы Айдар Хәев та Камбәр Хабибуллинның район медицинасы тарихында аерым урын алып торуын билгеләп үтте. Аның сүзләренчә, хастаханә төзелеше, коллективны тәҗрибәле кадрлар белән туплау һәм дәвалау эшен үстерүдәге казанышларның нигезендә тәҗрибәле җитәкченең хезмәте ята.

— Бүгенге чара — үткәннәргә хөрмәт белдерү генә түгел, ә безнең өчен, бүгенге медицина хезмәткәрләре өчен, аның бай мирасына лаеклы булу турында да искәртү, — диде Айдар Хәев.

Истәлеккә һәм киләчәк буыннарга хөрмәт

Мемориаль тактаны булдыруга өлеш керткәннәргә дә рәхмәт сүзләре яңгырады. Аны ясауны финанслауда «Благодарение» фонды президенты Фәрит Муллагалиевич Салихов ярдәм күрсәткән. Мемориаль такта авторы — Гадел Маликов.

Камбәр Хәмидулла улы Хабибуллин истәлегенә куелган мемориаль такта — аның күпьеллык хезмәтенә, район медицинасы үсешенә керткән өлешенә һәм кешеләр күңелендә сакланган ихтирамга дәлил. Бу истәлек яшь буын медицина хезмәткәрләренә дә һөнәрләренә тугры булу, кешеләргә ярдәм итү һәм сайлаган юлларында җаваплылык белән хезмәт итү кирәклеген искәртә.