Гасырлык гомер — батырлык һәм хезмәт үрнәге

Вазих Фатыйхович 1926 елның 20 гыйнварында татар авылы Суксуда дөньяга килә. 1943 елда ул фронтка чакырыла. Казанда дүрт айлык хәрби әзерлек узганнан соң, Беренче Украина фронты составында Польша җирләрендә артиллерист булып хезмәт итә. 1944 елда авыр яралану сәбәпле демобилизацияләнә. Җиңү көнен туган авылында каршы ала.

Сугыштан соңгы елларда Вазих абый колхозда намуслы хезмәт куя: бригадир һәм бухгалтер вазифаларын башкара. Бүгенге көндә ветеран Яр Чаллы шәһәрендә яши, ә җәй айларын, күпьеллык традициягә тугры калып, туган авылы Татар Суыксуында  үткәрә.

Гасырлык юбилее уңаеннан Вазих Фатыйховичны Актаныш районы башлыгы Ленар Рафак улы Зарипов Яр Чаллы шәһәренә барып шәхсән котлады.

— Аллага шөкер, Вазих абый чын фронтовикка хас ныклык һәм күтәренке рух белән яши. Район тормышы белән кызыксына, яңалыкларны даими күзәтеп бара. Сезгә ныклы сәламәтлек, озын гомер телим, алдагы Бөек Җиңү юбилейларын да бергәләп каршы алырга язсын, — дип билгеләп үтте район башлыгы.

Без дә Вазих абыйны ихлас күңелдән 100 яшьлек юбилее белән котлыйбыз! Аңа ныклы сәламәтлек, җан тынычлыгы, якыннарының игътибары һәм ихтирамын телибез. Аның гомер юлы киләчәк буыннар өчен батырлык, түземлек һәм Ватанга чиксез мәхәббәт үрнәге булып калсын.