Ленар Зарипов һәм физкультура- спорт белән даими шөгыльләнүче райондашларыбыз ГТОның Алтын билгесенә лаек булды

ГТО аббревиатурасы Совет чорыннан барыбызга да таныш. Бу – «Хезмәткә һәм оборонага әзер» Бөтенроссия физкультура-спорт комплексы.

Россия Федерациясе президенты Владимир Путин тәкъдиме белән ГТО нормативларын тапшыру яңадан торгызылды. ГТО нормаларын 6 яшьтән алып 60ка кадәр булган кешеләр тапшыра ала. Әлеге нормалар 11 яшь төркеме өчен билгеләнгән. Өч кыенлыкта үзеңнең мөмкинлегеңне күрсәткәннән соң, нормативларны үтәү дәрәҗәсенә карап алтын, көмеш һәм бронза значоклары бирелә.

Бүген Физкультурачылар көнендә дүрт райондашыбыз ГТОның Алтын билгесенә лаек булды. Алар арасында Актаныш районы башлыгы Ленар Зариповның булуы сәламәт яшәү рәвешенә һәм спортка тартылуда башка райондашларга аеруча үрнәк өлге. 

ГТОның Алтын билгесенә Актаныш муниципаль районы Башкарма комитет җитәкчесенең социаль мәсьәләләр буенча урынбасары Дилбәр Әнвәрова, Актаныш икмәк кабул итү оешмасында эшләгән Ленар Гәрәев һәм Камил Ибраһимов та бар.

ГТОның Алтын билгесенә лаек булган райондашларыбызны чын күңелдән котлыйбыз, киләчәктә дә физкультура һәм спорт белән дус булырсыз, дигән теләктә калабыз.

• Бүген районыбызда Физкультурачылар бәйрәме узды.
•  
• Актаныш районының спорт һәм физкультура юнәлешен үстерүче хезмәткәрләр Татарстан Республикасы һәм Актаныш районы хакимияте бүләкләренә лаек булды.
•  
• Волейбол лигасында җиңүче мәктәпләргә спорт туплары бирелде.
•  
• Дүрт райондашыбызга ГТОның Алтын билгеләрен тапшырдылар.